சாஞ்சிசாஞ்சி ஸ்தூபி, மகாத்மா காந்தி படத்துடன் இன்று வெளியிடப்படுகிறது 200 ரூபாய் நோட்டு: ரிசர்வ் வங்கி அதிகாரப்பூர்வ அறிவிப்பு

 200 நோட்டு இன்று வெளியிடப்படுவதாக ரிசர்வ் வங்கி அறிவித்துள்ளது. இதுகுறித்து ரிசர்வ் வங்கி வெளியிட்ட அறிவிப்பில் கூறியிருப்பதாவது: புதிய 200 நோட்டு ஆகஸ்ட் 25ம் தேதி (இன்று) வெளியிடப்படுகிறது. மகாத்மா காந்தி வரிசையிலான இந்த நோட்டில், ரிசர்வ் வங்கி கவர்னர் உர்ஜித்  படேல் கையெழுத்து இருக்கும். மகாத்மா காந்தி படம் இடம் பெற்றிருக்கும். பின்புறம் நாட்டின் பாரம்பரிய பண்பாட்டு சின்னங்களில் ஒன்றான சாஞ்சி  ஸ்தூபி பொறிக்கப்பட்டிருக்கும். அடர்த்தியான மஞ்சள் நிற பின்னணி கொண்டதாக இருக்கும். 200 என்பது எண்ணிலும், தேவநாகரியிலும் இடம்பெற்றிருக்கும். நுண்ணிய எழுத்துக்களில் ஆர்பிஐ, பாரத், இந்தியா, 200  ஆகியவை இருக்கும்.  பாதுகாப்பு இழையில் ஆர்பிஐ, பாரத் என எழுதப்பட்டிருக்கும். நோட்டை வெவ்வேறு கோணங்களில் அசைத்து பார்க்கும்போது இழையிலுள்ள நிறம்  பச்சையில் இருந்து நீல நிறமாக மாறும். 200 என்ற எண்ணிற்கு முன்பு ரூபாய் குறியீடு இடம்பெற்றிருக்கும். இதுபோல் அசோக தூண், நீர்  எழுத்துக்களில் மகாத்மா காந்தி உருவம் என வழக்கமாக பிற ரூபாய் நோட்டுகளில் உள்ள அம்சங்களும் இருக்கும்.

  நோட்டின் பின்புறத்தில் இடது புறம் அச்சிட்ட வருடம் குறிக்கப்பட்டிருக்கும். சுவாச் பாரத் வாசகம்இடம்பெறும். பார்வையற்றவர்கள் அடையாளம்  காண மேலெழுந்த வகையில் H என்ற ஆங்கில எழுத்து, கோடுகள் மற்றும் குறியீடுகள் பொறிக்கப்பட்டிருக்கும். ரூபாய் நோட்டின் அளவு 66 மி.மீ. x  146 மி.மீ ஆக இருக்கும் இவ்வாறு ரிசர்வ் வங்கி தெரிவித்துள்ளது.  சில நாட்களுக்கு முன்பே 200 நோட்டு வெளியாகும் தகவல் மற்றும் அதன் மாதிரி வலை தளங்களில் வலம் வந்தன. இந்த மாத இறுதியில் அல்லது  அடுத்த மாத தொடக்கத்தில் இந்த நோட்டு புழக்கத்துக்கு வரும் என கூறப்பட்டது. இந்நிலையில், ரூபாய் நோட்டு வெளியாகும் தேதி மற்றும்  விவரங்களை ரிசர்வ் வங்கி அதிகாரப்பூர்வமாக நேற்று வெளியிட்டுள்ளது குறிப்பிடத்தக்கது. 200 நோட்டு சில்லரை தட்டுப்பாட்டை தீர்த்து  பரிவர்த்தனையை எளிதாக்கும் என ரிசர்வ் வங்கி தெரிவித்துள்ளது .